Wednesday, April 18, 2007

TESDA CEBU MODAWAT OG SCHOLARSHIP APPLICANTS


Cebu City (April 19, 2007) – Gibutyag ni TESDA Cebu Provincial Director Mariflor Liwanang nga adunay duha ka gatos ka buok scholars alang sa pagtuon og medical transcription ang padayon karon nga gipangita sa ilang buhatan.

Si Liwanag nagkanayon usab nga kadtong mga interesado sa maong scholarship pwedeng mobisita sa ilang buhatan nga anaa mahimutang sa Archbishop Reyes ning siyudad.

Pipila sa mga gikinahanglan sa mga aplikante aron mo-qualify naglakip sa pagkagradwado sa high school, dagko og grado sa math, science, og English, ingon man makapasar sa qualifying examination.

Ang mga scholars makadawat sa P10 mil og training nga modangat sa 100 hours. Sa pagkakaron, tulo pa lang ang nakapasar sa pasulit sa TESDA alang sa medical transcription course scholarship sa rehiyon.(Roberto M. Cabardo)

SAAD NI PGMA PAGHATAG 1M KA TRABAHO MAKAB-OT

Cebu City (April 19, 2007) – “Dili bakak ang pasalig sa pamuno nasod nga makahatag og usa ka milyon ka mga trabaho matag tuig.”

Kini maoy pamahayag sa OIC -Regional Director sa POEA Visayas, Evelia Durato, sa Kapihan sa PIA kagahapon.

Matud ni Durato, sa niaging tuig adunay sobra 1.4 milyones ka mga Pinoy ang nakatrabaho sa gawas sa nasod sa niaging tuig.

Nag-una sa mga Pinoy nga atua na karon sa abroad mao ang mga skilled workers nga sagad magtrabaho sa mga construction sites sa nagkalainlaing bahin sa kalibutan.(Roberto M. Cabardo)

EMPLOYMENT SITUATION SA CENTRAL VISAYAS, POSITIBO

Cebu City (April 19, 2007) –Sukad sa Enero ning tuiga maayo ang resulta sa pagpanarbaho dinhi sa tunga-tungang Kabisay-an.

Mao kini giingon ni Elias Cayanong, Regional Director sa Department of Labor and Employment dinhi sa rehiyon.

Sa 2.6 milyones ka miyembro sa workforce, duha ka gatos ka libo lang niini ang wala pa katrabaho.

Lakip sa gilantaw ni Grace Diaz, hepe sa Employment Promotion Division sa DOLE 7, nga nag-unang naghatag og trabaho sa mga lumulupyo dinhi mao ang information technology o cyberservices, manufacturing, hotel o restaurant o resort, mga health and wellness centers, construction, agribusiness, mining, aviation, og shipping.(Roberto M. Cabardo)