IRIGASYON OG KADALANAN DAGKO OG PAHAT SA 2008 BUDGET

Cebu City (September 5, 2007) – Mamahimo na unya nga mas malambuon og mas sayon ang agrikultura sa nasod kung maimplementar na ang dugang binilyon ka pesos nga proyekto sa irigasyon og kadalanan latas sa mga kabukiran .

Sa iyang pagbisita sa Nueva Ecija sa Central Luzon, gibutyag ni Presidente Gloria Macapagal-Arroyo nga ang kagamhanan nigahin og otso bilyones alang sa dugang irigasyon og singko bilyones ka pesos alang sa kadalanan nga giisip farm-to-market roads nga gilakip na sa budget sa nasod sunod tuig.

Kini gawas pa sa tres bilyones ka pesos kapin nga gigahin alang sa pagpaayo sa mga nangadaot nga irigasyon sa nasod.

Sa nasayran, ang Sugbo, Bohol og Negros Oriental dinhi sa tunga-tungang Kabisay-an adunay mga dagkong dam nga natukod.

Usa niini mao ang dako nga dam sa barangay Can-asuhan sa lungsod sa Carcar dinhi sa Sugbo. (Roberto M. Cabardo/PIA AMO 7 Cebu)