Cebu City (6 February) -- Inihap na lang ang adlaw sa mga salbahis nga miyembro sa fraternities sa Sugbo.
Kini human unya makumpleto ang mga grupo sa mga pulis nga molangkub sa Anti-Frat Wars og Street Violence sa Cebu City Police Office.
Sayo karong buntag, namahayag si Cebu City Police Senior Superintendent Patrocinio Comendador nga ang maong task force panguluhan nila ni Senior Inspector George Ylanan og Inspector Juanito Pajantoy.
Kung mahinumduman, ang kapolisan gihangyo sa mga negosyante sa dakbayan sa pagpuhag sa mga gang og fraternities nga naghatag kaguliyang og hinungdan sa mga patay og pagparegla nga nahitabo sa nagkalain-laing lugar sa dakbayan.
Ang mga negosyante ilabi na ang mga nagsalig sa turismo nityabaw tungod kay ang mga frat wars sa syudad nihatag na man og kahadlok sa pipila ka turista og mamuhunan sa pagbisita sa Sugbo.
Sa nasayran, sobra sa usa ka gatos ka mga pagpamatay nga nahitabo sa Sugbo naglambigit sa frat wars og mga vigilante style killings nga nahitabo sa Sugbo sukad pa niadtong dos mil saez.
Sa iyang panapos nga pamahayag, niawhag si Comendador sa mga ginikanan pagpadayon sa ilang pagmonitor sa ilang mga anak.
Base sa panukiduki sa mga sociologists, ang pagdagsang sa frat og gang wars nagpakita sa kapakyas sa mga ginikanan paghatag atensyon sa ilang mga anak og nagpaila lang kini sa krisis sa mga pamilya sa usa ka lugar.
Ang mga frat wars naglambigit sa mga sakop sa AKRHO og Tau Gamma ingon man Crips og Bloods nga giingong mao ra gihapon nga mga grupo. (PIA Cebu/RMC)
No comments:
Post a Comment