Global recognition sa Coral Triangle, gikalipay sa BFAR 7

Cebu City (8 February) -- Gikalipay sa mga taga–Bureau of Fisheries and Aquatic Resources (BFAR) Central Visayas ang dakong atensyon nga gihatag sa mga magpapatigayon sa tibuok kalibutan sa coral triangle nga gilangkuban sa kadagatan sa silangang bahin sa Indonesia, Malaysia, og Pilipinas.

Lakip sab sa coral triangle ang kadagatan sa Papua New Guinea, Timor Leste og Solomon Islands.

Matud ni Tiburcio C. Donaire, hepe sa Fisheries Extension Training and Communication sa BFAR 7, ang awhag sa world economic leaders nagpakita lang nga importante sa panginabuhi sa katawhan sa kalibutan ang pagpreserbar sa lugar diin nahimutang ang pinakaabundang kadagatan sa kalibutan.

"Of course yes, dako kaayo ni'g papel sa pagpreserbar sa flora and fauna sa biodiversity sa coral triangle."

Dinhi sa Central Visayas aduna say gideklarar nga coral triangle nga gilangkuban sa kadagatan sa Bohol, Negros Oriental og Sugbo lakip na sa Siquijor.

Matud ni Lourdes Arciaga, tigpamaba sa BFAR sa pinakaulahi nilang pagsusi sa coral triangle nag-anam na og kadaghan ang mga itloganan sa isda kon coral reefs sa nahisgutang lugar.

Nidugang sab si Arciaga pag-ingon nga ang mga coral reefs importante alang sa mga isda og uban pang mga nilalang sa dagat.(Roberto M. Cabardo/PIA 7 Cebu)

Mahinumduman nga ang mga negosyante nga nitambong sa world economic forum nihangyo kang Presidente Gloria Macapagal-Arroyo sa pagpabiling limpiyo og luwas alang sa mga isda og ubang produkto sa dagat ang coral triangle. (PIA Cebu/RMC)