Cebu City (June 5, 2007) – Mas hapsay ang pagbukas sa klase kagahapon kung itandi sa niaging tuig. Kini maoy pamahayag sa DepEd Regional Director Carolino Mordeno.
Matud ni Mordeno, hapsay ang pagpahigayon sa klase kagahapon og nanghinaut sab siya nga kini magpadayon.
Nidugang sab si Mordeno pag-ingon nga ang mga bata nga mao pay pagtungtong sa Grade One mainit nga gidawat sa mga eskwelahan kagahapon pinaagi sa usa ka programa, banda, og ingon man pagpaila-ila og pagpasuroy sa mga bata palibot sa eskwelahan.
Kalabut niini, gilantaw sa guidance counselor sa Tisa II Elementary School, Marietta Igonia nga maayo ang epekto sa maong pamaagi pagdawat sa kabataan kay dili na man kini maghilak og mahimong pwerhisyo sa mga ginikanan og mga magtutudlo.
Sa assessment sab sa Assistant Division Superintendent sa DepEd Cebu Provincial Office, Dr. Evangel Luminarias, niingon siya nga sa probinsiya sa Sugbo, hapsay kaayo og way kakulian nga nasinati ang mga eskwelahan.
Sa nasayran, gipaabot nga adunay uno porsiyento nga pagsaka sa mga estudyante sa elementarya og dos porsiyento usab sa sekondarya.
Sa niaging tuig, ang mga publikong tunghaan adunay nueve cientos doce ka libo ka mga estudyante ang nitungha sa elementarya, samtang kwatro cientos singkwenta ka libo sab ang nitungha sa high school dinhi sa Central Visayas. (Roberto M. Cabardo/PIA AMO 7 Cebu)
No comments:
Post a Comment