BFAD MIPAHUGOT SA PAGMONITOR SA PROCESSED FOODS

Cebu City (August 10, 2007) – Aron pagseguro nga luwas ang pagkaon sa katawhan, padayon nga gihingusgan karon sa BFAD ang monitoring sa mga processed foods.

Kini maoy gibutyag ni Monina Coyoca, ang hepe sa Bureau of Food and Drugs dinhi sa rehiyon.

Niingon sab si Coyoca nga sa niaging semana, aduna na silay gipadala nga mga processed foods nga gagikan sa laing nasod aron masusi sa ilang laboratoryo sa kauluhan kung ang maong mga produkto luwas ba nga kaonon.

Kung mahinumduman, ang BFAD nidili sa pagpakaon sa katawhan sa pipila ka mga produktong gikan sa China human nasayran nga ang mga noodles, white rabbit, processed meat og uban pang produkto adunay sagol nga formalin nga sagad gamiton sa pag-embalsamar og dili angay nga isagol sa pagkaon sa tawo.

Sa katapusan, padayong gipahimangnuan sa BFAD ang publiko sa dili una pagkaon sa mga produktong gagikan sa China.(Roberto M. Cabardo/PIA AMO 7 Cebu)