Friday, August 10, 2007

CORN FESTIVAL IPAHIGAYON SA SYUDAD SA TOLEDO

Cebu City (August 9, 2007) – Human sa napulo ka tuig nga pagkahunong, ang syudad sa Toledo sa probinsya sa Sugbo maoy napili nga lugar diin saulugon ang Corn Festival karong petsa biente dos hangtud biente kwatro ning bulana.

Gipaabot nga motambong sa kalihukan ang kalihim sa Deparrment of Agriculture, Arthur Yap isip pinasidunggang dinapit kauban ang mga opisyales sa probinsya pinanguluhan ni Gobernador Gwendolyn Garcia og sa mayor sa Toledo City Arlene Zambo.

Gibutyag ni Francisco Sopsop, Regional Coordinator sa programa alang sa mais sa DA 7 nga ang maong kalihukan gihimo sa Toledo City tungod kay ang Toledo mao man ang adunay pinakadako nga umahan sa mais dinhi sa tunga-tungang Kabisay-an.

Si Alfonso Mercado, konsehal sa Toledo City, nibutyag sab nga human sa pait nga kasinatian sa Toledo City sa dihang nanira ang Atlas Mining sa sayong bahin sa dekada nobenta, gitinguha gayud sa dakbayan sa Toledo ang pagbalanse sa industriya og agrikultura mao nga gikalipay nila ang pagpahigayon og corn festival sa ilang syudad.

Sa nasayran, nobenta porsiyento sa populasyon sa rehiyon ang mokaon og mais ilabi na nga nahibaw-an sab karon nga maayo ang mais kay sa humay alang niadtong adunay sakit nga diabetes.

Ang nasudnong kagamhanan, nagplano na sab karon sa paghimo og biofuel o alternatibong source sa biofuel nga isambog sa gasolina.(Roberto M. Cabardo/PIA AMO 7 Cebu)

No comments: