Cebu City (4 October) -- Namahayag si Presidente Gloria Macapagal Arroyo, atol sa iyang pagbisita sa nasud Tsina, nga dili mahadlok ang Pilipinas sa globalisasyon, hinoon mahimo kining ang-ang pagbuntog sa kalisud ug tulay ngadto sa modernisasyon.
Ang paspas nga paglambo sa ekonomiya sa Tsina gilauman nga moabli ug bag-ong luna sa negosyo ug pamuhunan taliwa sa duha ka nasud, matud sa presidente.
Sa gipahigayon nga Philippine Business and Investment Forum (PBIF) pinangunahan sa Shanghai Overseas Chinese Chamber of Commerce (SOCCC) kagahapon, si Presidente Arroyo namahayag nga ang Pilipinas padayong nangita ug ka-tambayayong sa multilateral ug bilateral trade aron makasalmot kini sa globalisasyon.
Matud niya, ang pagpalihok sa Doha Round sa World Trade Organization (WTO) pabor gayud sa Pilipinas ug makaayo sa tanang nasud.
Kumpyansa ang presidente nga ang kinatibuk-ang relasyon sa Pilipinas ug Tsina mas ligdong na sa pagka-karon ug nga duna pa kini kalakip nga mga proyekto nga diin maoy makapalawom pa unya sa panagbaylo-ay sa natad sa negosyo ug pamuhunan tali sa nahisgutang mga nasud.
Ang presidente nagkanayun nga ang Tsina maoy ika-tulo nga pinaka-daku nga partner sa Pilipinas.
Iya usab nga gipamahayag nga resulta sa mga reporma sa panalapi ubos sa iyang administrasyon, ang nasud Pilipinas nagsubay na sa dalan sa permanenting pagtubo sa ekonomiya ug sa paglig-on niini.
Ang pagdagsang sa puhunan, matud niya, gipunduhan na pinaagi sa multi-million-dollar nga puhunan sa mga dagku nga internasyunal nga kumpanya mao nga ang gobyerno hingusganong naningkamot pagmintinar sa mga positibong kalambu-an sa ekonomiya. (ECD/PIA 7)
No comments:
Post a Comment