Thursday, October 25, 2007

"Sing for Me" project, gilusad sa DSWD

Cebu City (October 24) -- Gilusad kagahapon ang Sing for Me Project sa Department of Social Welfare and Development dinhi sa tunga-tungang Kabisay-an.

Matud ni Jaybee Carillo, tigpamaba sa DSWD, ang maong proyekto gitumong sa pagtigum og pondo alang sa pagtukod og kasamtangang kapuy-an sa mga batang nahisalaag nga gitawag og children in conflict with the law kon cicl.

Sa iyang bahin, si Nemia Clara Antipala, hepe sa Technical Assistance Division sa DSWD nagkanayon nga importante nga matabang ang mga batang nahisalaag kay sagad sila man ang sagad makahimo og salaod.

Nibutyag sab si Antipala nga ang rehiyon, aduna lay usa ka rehabilitation center alang sa mga bata nga nahimutang sa lungsod sa Argao nga modawat lang og setenta ka mga bata. Kini kulang kaayo kung itandi sa kadako sa area sa Central Visayas.

Gilantaw sab sa DSWD nga mas importante ang pagbaton sa kada probinsya sa Central Visayas og usa ka temporary shelter sa mga batang nakalapas sa balaod sa dili pa sila ibalik sa ilang mga pamilya.

Sa nasayran, ubos sa Acta Republika 9344 kon Juvenile Justice Law, ang mga batang nakalapas sa balaod dili na ibalhog sa bilangguan apan kadtong bug-at og salaod ipaubos sa diversion program sa DSWD og sa accredited nga mga pasilidad sa nahisgutang ahensiya.

Nahibaw-an human sa usa ka pagtuon nga ang mga batang giipon pagpriso sa mga hingkod na og pangedaron mograbe hinuon kabadlongon.

Sa Sing for Me Project, ang DSWD gilauman nga makatigum og pondo alang sa Bahay Pag-asa o temporary shelter sa children in conflict with the law og kini gilauman nga makaayo gyud sa paghatag higayon sa kabataan pagbag-o sa ilang kinabuhi.

Ang maong proyekto magsugod karong Sabado sa hapon sa University of Southern Philippines kon USP amphitheater diin lain-laing mga grupo sa children’s choir ang mohalad og awit sa Pasko alang sa mga bisita nga gilaumang mohatag suportang pinansyal sa mga proyekto sa DSWD og sa mga partner institutions niini alang sa pagtukod sa mga Balay sa Paglaum alang sa kabataan. (PIA Cebu/RMC)

No comments: