Tuesday, October 23, 2007

Mga mamumuhunan nagplano pagtukod ug mga planta sa biofuel

Ang Department of Agriculture (DA) kagahapon namahayag nga daghan na nga mga mamumuhunan ang nagplano pagtukod ug mga planta sa biofuel sa nagkalain-lain nga lugar sa nasud.
Matud ni DA Secretary Arthur C. Yap, ang mga mamumuhunan mipadayag na sa ilang plano pagtukod ug mga planta sa Ilocos Region, Cagayan Valley, Western Visayas, Zamboanga Peninsula, Northern ug Central Mindanao ug sa Davao Region.
Si Secretary Yap nagkanayun nga ang DA naglaum nga nga nagkadaku nga panginahanglan sa alternatibo nga lana nga nagagikan sa tanom mopalambo pa sa sector sa panguma sa nasud, mopataas sa ganansya sa gagmay nga mga negosyante ug mopakunhod sa pagdepende sa nasud sa mga imported nga tinubdan sa enerhiya.
Ang DA mipasalig nga pinaagi sa Philippine Agricultural Development and Commercial Corp. (PADCC) ma-promote ang biofuel pinaagi sa pagpa-angbit ug kahibalo sa katawhan sa paggamit ug agricultural feed stocks alang sa ethanol ug biodiesel production.
Si Yap nag-ingon nga kasamtangan nang gitino sa nahisgutang buhatan ang mga sector sa pribadong mamumuhunan nga adunay kapin sa 400,000 ha ektarya sa yuta nga katamnan ug mga produkto nga gamiton unya nga feedstock alang sa paghimo ug biofuels.
Mokabat sa 90,000 ka ektarya niini anaa akita sa North Luzon Agribusiness Quadrangle; 10,000 ka ektarya usab sa Central Philippines ug 300,000ka ektarya niini sa Agribusiness Mindanao, dugang pa ni Yap.
Ang DA secretary usab nagkanayun nga ang nahisgutang mga luna mo-representar na ug 78% sa 600,000 ka ektarya nga target karong tuiga.
Kini maoy tamnan ug kamoteng-kahoy, oil palm, lubi, tubo, tuba-tuba ug uban pang mga tanom nga gamiton nga feedstock sa biofuel.
Kun kahinumduman, usa ka Memorandum of Agreement (MOA) ang gipirmahan tali sa Pilipinas ug sa PRAJ Industries sa India atoll sa pagbisita ni Presidente Arroyo sa maong nasud karong bag-o.
Sa Marso sunod nga tuig ang PRAJ Industries gikatakda na nga mosugod paghimo ug biofuel sa Ormoc City.(PIA-7/ECD)

No comments: