Wednesday, October 17, 2007

LAPU-LAPU CITY MIMUGNA OG SOCIALIZED HOUSING SA MATAG BARANGAY

Cebu City (October 17, 2007) – Agi og tubag sa tinguha ni Pres. Gloria Macapagal-Arroyo paghatag og higayon sa matag Pinoy nga makabaton og puy-anan, gibutyag sa kagamhanan sa dakbayan sa Lapu-Lapu ang pagahin og sites sa socialized housing sa matag barangay.
Sa pagkakaron, ang dakbayan sa Lapu-Lapu adunay gibana-bana nga mga siete mil ka mga informal settlers sa pagkakaron bunga na sab sa daghang trabahador sa duha ka Export Processing Zones sa maong syudad.
Sa press conference kagahapon, namahayag si Bise Mayor Mario Ramirez nga sa gidaghanon sa ilang informal settlers namugna ang socialized housing sites sa matag barangay sa dakbayan.
Pipila niini anaa mahimutang sa barangay Candagsao, Sudtonggan nga aduna na karoy siete cientos ka pamilya, Canjulao, Looc, Basak, Marigondon, og uban pa.
Dugang pa ni Amores, ang socialized housing project sa dakbayan sa Lapu-Lapu adunay budget nga mokabat sa siete milyones ka pesos karong tuiga samtang dies milyones na sab ang giaprubahan sa city council alang sa budget sunod tuig.
Ang kadaghan sa mga informal settlers sa Lapu-Lapu City usa sa hinungdan nga giingon sa Pag-ibig Fund og ubang ahensiya sa pagpahigayon sa Housing Fair karong petsa biente tres og biente kwatro sa Sports Complex sa nahisgutang dakbayan.(Roberto M. Cabardo/PIA AMO 7 Cebu)

No comments: