Tuesday, October 16, 2007

Fair sa baratong puy-anan sa mga way balay ipahigayon sa Lapu-Lapu City

Cebu City (October 16) -- Gilauman na sab nga ubay-ubay ang mga Bisaya labi na gyud sa mga Sugbuanon ang makapanag-iya na gyud og panimalay. Kini tungod kay human sa malampuson og paghangop sa publiko sa kalihukan nila sa niaging tuig, ang Pag-Ibig Fund mopahigayon na sab og Housing Fair karong Oktubre 23-24 didto sa Lapu-Lapu City Sports Complex.

Kauban sa Pag-Ibig sa paghimo sa Housing Fair part 2 ang mga ahensya sa kagamhanan sama sa GSIS, National Housing Finance and Mortgage Corporation, SSS, BSP, HLURB, National Housing Authority, HGC og mga real estate developers sa Kabisay-an.

Sa housing fair, ipahibalo sa katawhan ang mga panimalay nga naembargo o nabawi sa mga nahisgutang ahensya nga pwede na sab karong mapalit sa ubos nga presyo.

Gipasalig ni Dale Mark Antonio, tigpamaba sa Pag-Ibig Fund Cebu North nga andam silang motabang sa mga miyembro sa Pag-Ibig nga magkinahanglan og mga impormasyon og giya kalabot sa housing loan og sa housing fair didto mismo sa Lapu-Lapu City Sports Complex.

Base sa talaan sa National Statistics Office, ang Pilipinas daghan pa gihapon og mga lumulupyo nga wa pa makapanag-iya og balay sa pagkakaron.

Ang tema sa Housing Fair Part 2 mao ang Serbisyong Tapat, Abot Kayang Pabahay Para sa Lahat nga sa Binisaya pa nagpasabot sa Tinuoray nga Serbisyo, Baratong Puy-anan alang sa Tanan. (PIA Cebu/RMC)

No comments: